Ina Kasimati, mësuesja që kërkoi ndihmën e shqiptarëve për kthimin e saj në atdhe ka humbur betejën me sëmundjen e rëndë me të cilën vuante prej vitesh.
Lajmin e trishtë e ka bërë të ditur miku i saj Erjon Kristo.
Mësuesja e njohur për shumë breza në Tiranë, prej dy vitesh është mjekuar në Francë pas një sëmundjeje të rëndë, të cilën fatkeqësisht nuk ka mundur ta mposhtë.
“Zysh Ina i mbylli sytë përgjithmonë!
Me trishtim të thellë mora lajmin e ikjes nga jeta të zysh Ina Kasimatit.
Zysh Ina iku nga kjo jetë, por la pas shembullin më të mirë, sesi njeriu nuk duhet të dorëzohet kurrë përballë çdo vështirësie me të cilën mund të përballet.
Zysh Ina la pas shembullin sesi duhet të jetë modeli i një mesuesi, duke i dedikuar jetën një profesioni që e pa si mision.
Zysh Ina la pas shembullin më të mirë sesi duhet të jetë një grua e një nënë, e pathyeshme dhe mbrojtëse e të drejtave të njeriut.
Zysh Ina la pas shembullin e një LUFTËTAREJE që nuk u dorëzua kurrë!!!
Zysh Ina mbylli sytë në Vlorën e saj, pasi shqiptarët u bënë bashkë edhe njëherë, për ta sjellë në Shqipëri, për të plotësuar dëshirën e mësuese Inës.
Qofsh në paqe e mira Ina, njeriu i vlerave, i betejave, njeriu që nuk u dorëzua kurrë! Të qoftë dheu i lehtë.
Ngushëllime familjarëve!”, ka shkruar Kristo.